തിരുവനന്തപുരം ജനറൽ ആശുപത്രിയിലെ വനിതാ ഡോക്ടറെ ആക്രമിച്ചു, രോഗി പിടിയിൽ

തിരുവനന്തപുരം: ജനറൽ ആശുപത്രിയിലെ വനിതാ ഡോക്ടറെ രോഗി ആക്രമിച്ചു. ശസ്ത്രക്രിയാ വിഭാഗത്തിലെ ഡോക്ടറായ സി എം ശോഭയുടെ കൈയ്ക്ക് മർദ്ദനത്തിൽ പരിക്കേറ്റു. പ്രതിയായ വസീറിനെ പൊലീസ് കസ്റ്റഡിയിലെടുത്തു. വൃക്കയിലെ കല്ലിന് ചികിത്സ തേടിയാണ് രോഗി ശസ്ത്രക്രിയ ഒ.പിയിൽ എത്തിയത്. രോഗത്തിന്‍റെ വിശദാംശങ്ങൾ അദ്ദേഹത്തോട് വിശദീകരിച്ചപ്പോൾ, ദേഷ്യപ്പെടുകയും ഡോക്ടറെ മർദ്ദിക്കുകയും ചെയ്തു.

തലയ്ക്കു നേരെ വന്ന അടി തടുത്തപ്പോഴാണ് കൈയ്ക്ക് പരിക്കേറ്റത്. ഡോക്ടർ ജനറൽ ആശുപത്രിയിൽ ചികിത്സയിലാണ്. അക്രമിക്കെതിരെ കർശന നടപടി വേണമെന്ന് ശോഭ ആവശ്യപ്പെട്ടു. ആത്മാർത്ഥമായി പ്രവർത്തിക്കുമ്പോൾ ആളുകൾ ഇത്തരത്തിൽ പ്രവർത്തിക്കുന്നത് സമാധാനപരമായ അന്തരീക്ഷത്തെ തകർക്കുമെന്ന് അവർ പറഞ്ഞു.