ചില്ലറയായി തൂക്കി വിൽക്കുന്ന സാധങ്ങൾക്ക് ജിഎസ്ടി ഉണ്ടാവില്ല; നിർമ്മല സീതാരാമൻ

ദില്ലി: അരിയും ഗോതമ്പും ഉൾപ്പെടെയുള്ള ധാന്യങ്ങൾക്ക് ജിഎസ്ടി ഏർപ്പെടുത്തിയതിൽ വിശദീകരണവുമായി ധനമന്ത്രി നിർമ്മല സീതാരാമൻ. മുൻകൂട്ടി പായ്ക്ക് ചെയ്ത കാർഷിക ഉൽപ്പന്നങ്ങൾക്കായിരിക്കും നികുതിയെന്നും ധനമന്ത്രി പറഞ്ഞു. ചില്ലറയായി തൂക്കി വാങ്ങുമ്പോൾ ജിഎസ്ടി നല്‍കേണ്ടാത്ത ഭക്ഷ്യ ഉല്‍പ്പന്നങ്ങളുടെ പട്ടിക നിർമല സീതാരാമൻ ട്വിറ്ററില്‍ പങ്കുവെച്ചു. ലേബൽ ചെയ്ത് പായ്ക്ക് ചെയ്ത 25 കിലോയിൽ താഴെ ഭാരമുള്ള ധാന്യങ്ങൾക്ക് 5 ശതമാനം ജിഎസ്ടി ഏർപ്പെടുത്തിയിട്ടുണ്ട്. അരി, മൈദ, തൈര് തുടങ്ങിയ കാർഷിക ഉത്പന്നങ്ങൾക്ക് 5 ശതമാനം ജിഎസ്ടി ഏർപ്പെടുത്തിയത് ജിഎസ്ടി കൗണ്‍സില്‍ യോഗത്തിനു ശേഷമായിരുന്നു. ജിഎസ്ടി കൗൺസിൽ സംയുക്തമായാണ് നികുതി ഏർപ്പെടുത്താനുള്ള തീരുമാനമെടുത്തതെന്നും ധനമന്ത്രി പറഞ്ഞു. ജിഎസ്ടി നടപ്പാക്കുന്നതിന് മുമ്പ് ചില സംസ്ഥാനങ്ങൾ ഇത്തരം ഭക്ഷ്യോൽപന്നങ്ങൾക്ക് നികുതി ഏർപ്പെടുത്തിയിട്ടുണ്ടെന്നും ധനമന്ത്രി ലോക്സഭയെ അറിയിച്ചു. അരി, ഗോതമ്പ്, ചോളം, പയർവർഗ്ഗങ്ങൾ, പയർവർഗ്ഗങ്ങൾ, പയർവർഗ്ഗങ്ങൾ, ഓട്സ്, ആട്ട/മാവ്, സൂചി/റവ, തൈര് , ലസ്സി തുടങ്ങിയവ ചില്ലറ വിൽപ്പനയിൽ വാങ്ങുന്നതിൻ നികുതിയില്ലെന്നും ധനമന്ത്രി പറഞ്ഞു. ജിഎസ്ടി കൗൺസിലിന്റെ 47-ാമത് യോഗത്തിലാണ് കാർഷിക ഉൽപ്പന്നങ്ങളെ ജിഎസ്ടിക്ക് കീഴിൽ കൊണ്ടുവരാൻ തീരുമാനിച്ചത്. ഇത് ഇന്നലെ പ്രാബല്യത്തിൽ വന്നതോടെ, മുൻകൂട്ടി പായ്ക്ക് ചെയ്തതും മുൻകൂട്ടി ലേബൽ ചെയ്തതുമായ കാർഷിക ഉൽപ്പന്നങ്ങളുടെ വില വർദ്ധിച്ചു. ഇത്തരം പായ്ക്ക് ചെയ്ത ഉൽപ്പന്നങ്ങൾക്ക് 5 ശതമാനം എന്ന നിരക്കിലാണ് ജി.എസ്.ടി ചുമത്തിയിരുന്നത്.