ചില പോലീസുകാരുടെ പ്രവൃത്തി സേനയ്ക്ക് കളങ്കമുണ്ടാക്കുന്നുവെന്ന് മുഖ്യമന്ത്രി

തിരുവനന്തപുരം: പൊലീസിനെതിരെ രൂക്ഷവിമർശനവുമായി മുഖ്യമന്ത്രി പിണറായി വിജയൻ. വിരലിലെണ്ണാവുന്ന ആളുകളുടെ പ്രവർത്തനങ്ങൾ സേനയുടെ പ്രതിച്ഛായയ്ക്ക് മങ്ങലേൽപ്പിക്കുകയാണെന്ന് അദ്ദേഹം പറഞ്ഞു. ഇത്തരക്കാരെ സംരക്ഷിക്കേണ്ട ഉത്തരവാദിത്തം സേനയ്ക്കില്ല. അവരുടെ ഭാഗത്ത് നിന്ന് മൂന്നാംമുറ ഇല്ലെന്ന് പോലീസ് ഉറപ്പാക്കണമെന്നും അദ്ദേഹം പറഞ്ഞു.

അഭിമാനപൂര്‍വം തലയുയർത്തി നിൽക്കുന്ന സേനയാണ് ചിലരുടെ പ്രവർത്തികൾ കാരണം തലകുനിക്കേണ്ടിവരുന്നത്. സമൂഹത്തിനും സേനയ്ക്കും യോജിക്കാത്ത ഇത്തരം പ്രവർത്തനങ്ങളിൽ ഏർപ്പെടുന്നവരോട് ദയയോ അനുകമ്പയോ കാണിക്കാൻ കഴിയില്ല. അത്തരം ആളുകളുടെ പ്രവർത്തനങ്ങൾ സേനയ്ക്ക് യോജിച്ചതല്ല. ഇത്തരക്കാരെ സംരക്ഷിക്കേണ്ട ബാധ്യത സേനയ്ക്കില്ലെന്നും മുഖ്യമന്ത്രി പറഞ്ഞു.

മോശം കാര്യങ്ങൾ ചെയ്യുന്നവർക്കുള്ള മുന്നറിയിപ്പാണ് മുഖ്യമന്ത്രിയുടെ വാക്കുകൾ. ജനങ്ങൾക്ക് പോലും അസൗകര്യമുണ്ടാക്കുന്ന ചില പ്രവൃത്തികൾ റിപ്പോർട്ട് ചെയ്യുന്ന പശ്ചാത്തലത്തിലാണ് മുഖ്യമന്ത്രിയുടെ മുന്നറിയിപ്പ്. പരാതിയുമായി വരുന്ന ഒരാൾക്ക് പോലീസ് ഉദ്യോഗസ്ഥന്‍ തന്നേക്കാള്‍ പ്രാധാന്യം നല്‍കണമെന്നും മുഖ്യമന്ത്രി പറഞ്ഞു.