കാർത്തി ചിത്രം ‘സർദാർ’ ദീപാവലിക്ക് പ്രദർശനത്തിന് എത്തും

പി എസ് മിത്രൻ സംവിധാനം ചെയ്ത കാർത്തി നായകനായ ‘സർദാർ’ ഏറെക്കാലമായി വാർത്തകളിൽ നിറഞ്ഞുനിൽക്കുന്ന ചിത്രമാണ്. ചിത്രത്തിൽ നടൻ അവതരിപ്പിക്കുന്ന ഇരട്ട വേഷമാണ് ഇതിനുള്ള പ്രധാന കാരണം. കാർത്തിയുടെ ഈ വർഷത്തെ മൂന്നാമത്തെ റിലീസായിരിക്കും ഈ ചിത്രം. അസർബൈജാൻ, ജോർജിയ എന്നിവിടങ്ങളിൽ ചിത്രത്തിന്‍റെ ഒരു വലിയ ഷെഡ്യൂൾ ഷൂട്ട് ചെയ്ത ശേഷം ടീം ഇപ്പോൾ ചെന്നൈയിലേക്ക് മടങ്ങുകയാണ്. തമിഴ്നാട്ടിലെ ജനപ്രിയ റെഡ് ജയന്‍റ് മൂവീസിന്‍റെ ബാനറിലാണ് ‘സർദാർ’ റിലീസ് ചെയ്യുന്നത്. ദീപാവലി റിലീസിന് തയ്യാറെടുക്കുകയാണ് ചിത്രം. വരും ദിവസങ്ങളിൽ കൂടുതൽ പ്രഖ്യാപനങ്ങൾ ഉണ്ടാകുമെന്നാണ് സൂചന.