ചൈന അതിർത്തി സന്ദർശിക്കാൻ കോൺ​ഗ്രസ് ഉന്നതതല സംഘം

അരുണാചൽ പ്രദേശ്: ഉന്നതതല കോൺഗ്രസ് പ്രതിനിധി സംഘം ചൈന അതിർത്തി സന്ദർശിക്കും. അരുണാചൽ പ്രദേശ് അതിർത്തിയാണ് സന്ദർശിക്കുക. ചൈനീസ് അധിനിവേശം സംഘം നേരിട്ട് കണ്ട് വിലയിരുത്തും. നോർത്ത് ഈസ്റ്റ് കോൺഗ്രസ് കോ-ഓർഡിനേഷൻ കമ്മിറ്റിയുടെ നേതൃത്വത്തിലാണ് സന്ദർശനം. എൻ.ഇ.സി.സി കൺവീനർ പ്രദ്യുത് ബോർഡോലോയ് ആണ് ഇക്കാര്യം അറിയിച്ചത്.

ചൈനീസ് നുഴഞ്ഞുകയറ്റം സംബന്ധിച്ച റിപ്പോർട്ടുകളെ തുടർന്ന് അരുണാചൽ പ്രദേശിലെ ഇന്ത്യ-ചൈന അതിർത്തി പ്രദേശങ്ങളിലെ സ്ഥിതിഗതികൾ നേരിട്ട് കണ്ട് വിലയിരുത്താനാണ് കോൺഗ്രസ് പ്രതിനിധി സംഘം അതിർത്തി പ്രദേശങ്ങൾ സന്ദർശിക്കുന്നത്.

ചൈനീസ് കടന്നുകയറ്റത്തെക്കുറിച്ച് ബി.ജെ.പിയുടെ നേതൃത്വത്തിലുള്ള കേന്ദ്ര സർക്കാർ മൗനം പാലിച്ചതാണ് അതിർത്തി സന്ദർശനത്തിന് കാരണമെന്ന് പ്രദ്യുത് ബോർഡോലോയ് പറഞ്ഞു.