ദുല്‍ഖര്‍ നായകനായി ബോളിവുഡ് ത്രില്ലർ ചിത്രം ‘ചുപ്’

കര്‍വാന്‍, ദി സോയ ഫാക്ടര്‍ എന്നീ ചിത്രങ്ങൾക്ക് ശേഷം ദുൽഖർ സൽമാൻ നായകനാകുന്ന ബോളിവുഡ് ചിത്രം ചുപ്പിന്റെ ട്രെയിലർ പുറത്തിറങ്ങി. ആർ ബാൽക്കി സംവിധാനം ചെയ്യുന്ന ‘ചുപ്: റിവഞ്ച് ഓഫ് ദി ആർട്ടിസ്റ്റ്’ ബോളിവുഡ് സിനിമാ നിരൂപകരെ വേട്ടയാടുന്ന ഒരു സീരിയൽ കില്ലറുടെ കഥയാണ് പറയുന്നത്.

സണ്ണി ഡിയോൾ, പൂജ ഭട്ട് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. ‘സീതാരാമ’ത്തിന്റെ വിജയത്തിന് ശേഷം ദുൽഖർ സൽമാൻ നായകനാകുന്ന അടുത്ത പാൻ-ഇന്ത്യൻ ചിത്രമാണ് ചുപ്പ്.

പഴയകാല ബോളിവുഡ് സിനിമയുടെ പശ്ചാത്തലത്തിൽ ഒരുങ്ങുന്ന ചിത്രത്തിൽ ധാരാളം സിനിമാ ഗാനങ്ങളും പോസ്റ്ററുകളും പുനർനിർമ്മിക്കപ്പെടുന്നു എന്നതാണ് ട്രെയിലറിന്റെ പ്രധാന ആകർഷണം. ഒരു സംവിധായകന്റെ കഥ പറയുന്ന പഴയ ബോളിവുഡ് ചിത്രമായ കാഗസ് കെ ഫൂലിനെക്കുറിച്ചുള്ള പരാമർശങ്ങൾ കഥയുടെ ഉദ്ദേശ്യത്തിന്റെ സൂചനകൾ നൽകുന്നു.

ഇംഗ്ലീഷ് വിംഗ്ലീഷ്, പാ, ഡിയർ സിന്ദഗി തുടങ്ങിയ ചിത്രങ്ങൾ നിർമ്മിച്ച ബാൽക്കിയുടെ പാഡ്മാൻ എന്ന ചിത്രത്തിന് ശേഷമുള്ള സിനിമയാണ് ചുപ്. ബാൽക്കി, രാജ സെൻ, ഋഷി വിരമാണി എന്നിവർ ചേർന്ന് എഴുതിയ ഈ ചിത്രത്തിന് സംഗീതം നൽകിയിരിക്കുന്നത് എസ് ഡി ബര്‍മന്‍, അമിത് ത്രിവേദി, സ്‌നേഹ ഖാന്‍വാക്കര്‍, അമന്‍ പാണ്ട് എന്നിവര്‍ ചേര്‍ന്നാണ്.