“പത്മഭൂഷൺ നൽകി ആദരിക്കും മുൻപ് കിട്ടിയ പദവി രാജ്യദ്രോഹി എന്നായിരുന്നു”

തിരുവനന്തപുരം: ‘റോക്കട്രി: ദ നമ്പി ഇഫക്റ്റ്’ നിരവധി ചോദ്യങ്ങൾക്കുള്ള ഉത്തരമാണെന്ന് ഐഎസ്ആർഒ മുൻ ശാസ്ത്രജ്ഞൻ നമ്പി നാരായണൻ പറഞ്ഞു. പത്മഭൂഷൺ ബഹുമതിക്ക് അർഹനാകുന്നതിനു മുമ്പ് തനിക്ക് നൽകിയ പട്ടം രാജ്യദ്രോഹിയുടേതാണെന്ന് നമ്പി നാരായണൻ പറഞ്ഞു. വിവാദം സൃഷ്ടിച്ച ആ കേസ് മാത്രമേ എല്ലാവർക്കും അറിയൂ, എന്നാൽ രാജ്യത്തിനുവേണ്ടി ചെയ്ത കാര്യങ്ങളെ പറ്റി ആർക്കും അറിയില്ല. വികാസ് എഞ്ചിനെക്കുറിച്ചും അതിന്റെ പ്രവർത്തനത്തെക്കുറിച്ചും ആർക്കും അറിയില്ല. അതിന് പിന്നിലെ പ്രവർത്തനമാണ് ചിത്രത്തിൻ്റെ കഥ എന്നും നമ്പി നാരായണൻ വ്യക്തമാക്കി. ഇതാണ് പല ചോദ്യങ്ങൾക്കുമുള്ള ഉത്തരം. 20 വർഷത്തെ ത്യാഗവും ജീവിതവും സംഭാവനകളും സിനിമയ്ക്ക് നൽകാൻ ഞങ്ങൾ ശ്രമിച്ചുവെന്നും നമ്പി നാരായണൻ എന്താണെന്ന് പറയാൻ കഥ ശ്രമിച്ചുവെന്നും ചിത്രത്തിന്റെ സഹസംവിധായകൻ ജി പ്രജേഷ് സെൻ പറഞ്ഞു. ചിത്രത്തിന് മികച്ച തുടക്കം നേടാൻ കഴിഞ്ഞു. ഇത് തീർച്ചയായും കണ്ടിരിക്കേണ്ട സിനിമയാണെന്നും നമ്പി നാരായണന്റേത് ഓരോ ഇന്ത്യക്കാരനും അറിഞ്ഞിരിക്കേണ്ട ഒരു കഥയാണ് എന്നുമാണ് പ്രേക്ഷകരുടെ പ്രതികരണം.