ജിംനേഷ്യത്തിന് മുന്നിൽ കാറിലിരിക്കെ തട്ടിക്കൊണ്ടു പോകാൻ ശ്രമം; ഓടി രക്ഷപെട്ട് യുവതി

യമുനാനഗർ: ജിംനേഷ്യത്തിന് മുന്നിൽ വച്ച് തന്നെ തട്ടിക്കൊണ്ടുപോകാൻ ശ്രമിച്ച നാലംഗ സംഘത്തിന്‍റെ പിടിയിൽ നിന്ന് തലനാരിഴയ്ക്കു രക്ഷപെട്ട് യുവതി. ഹരിയാനയിലെ യമുനാനഗറിൽ ശനിയാഴ്ചയാണ് സംഭവം. ഇതിന്‍റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.

ജിംനേഷ്യത്തിലേക്ക് പോയ ശേഷം കാറിൽ ഇരിക്കുകയായിരുന്നു യുവതി. ഈ സമയം പരിസരം വീക്ഷിച്ചുകൊണ്ട് രണ്ടുപേർ കാറിന്‍റെ വാതിൽ തുറന്ന് അകത്തു കയറി. ഭയന്ന് നിലവിളിച്ച യുവതി എങ്ങനെയോ കാറിൽ നിന്നിറങ്ങി ഓടി രക്ഷപ്പെട്ടു. വീഡിയോയിൽ, സംഘം യുവതിയുടെ പിന്നാലെ ഓടുന്നത് കാണാം.

നാലംഗ സംഘമാണ് ഇതിന് പിന്നിലെന്ന് പൊലീസ് പറയുന്നുണ്ടെങ്കിലും രണ്ട് പേരെ മാത്രമേ വീഡിയോയിൽ കാണാൻ കഴിയുന്നുള്ളൂ. സംഭവത്തിൽ വിശദമായി അന്വേഷണം നടത്തിവരികയാണെന്നും നാലംഗ സംഘത്തിൽ ഒരാളെ അറസ്റ്റ് ചെയ്തതായും യമുനാനഗർ ഡിഎസ്പി കമൽദീപ് സിംഗ് പറഞ്ഞു. അന്വേഷണത്തിന് ശേഷം മാത്രമേ അക്രമികളുടെ ഉദ്ദേശ്യം വ്യക്തമാകൂവെന്ന് ഡിഎസ്പി പറഞ്ഞു.