ബിജെപി നേതാക്കളോട് വോട്ട് ചോദിച്ചതിന് തന്റെ സിം ബ്ലോക്ക് ചെയ്തെന്ന് മാർഗരറ്റ് ആൽവ

ന്യൂഡൽഹി: പ്രതിപക്ഷ വൈസ് പ്രസിഡന്‍റ് സ്ഥാനാർത്ഥിയും കോൺഗ്രസ് നേതാവുമായ മാർഗരറ്റ് ആൽവയുടെ സിം എംടിഎൻഎൽ ബ്ലോക്ക് ചെയ്‌തു. കെവൈസി ആവശ്യപ്പെട്ടിട്ടുണ്ടെന്നും ഇത് ദീർഘകാലമായി ഉപയോഗിക്കുന്ന സിം ആണെന്നും ഭരണകക്ഷി എംപിമാരോട് വോട്ട് ചോദിച്ചതിനാലാണ് നടപടിയെടുത്തതെന്നും മാർഗരറ്റ് ആൽവ ആരോപിച്ചു.

“നിങ്ങൾക്ക് ഇപ്പോൾ എന്‍റെ കെവൈസി വിവരങ്ങൾ ആവശ്യമുണ്ടോ?” മാർഗരറ്റ് ആൽവ ചോദിച്ചു. കേന്ദ്ര സർക്കാരാണ് ഈ നീക്കങ്ങൾക്ക് പിന്നിലെന്നും മാർഗരറ്റ് ആൽവയുടെ പ്രചാരണം തടസ്സപ്പെടുത്താനുള്ള ശ്രമമാണ് നടക്കുന്നതെന്നും കോൺഗ്രസ് ആരോപിച്ചു. കഴിഞ്ഞ ദിവസം ബിജെപി നേതാവും അസം മുഖ്യമന്ത്രിയുമായ ഹിമന്ത ബിശ്വ ശർമ്മയുടെ പിന്തുണ ആൽവ തേടിയിരുന്നു.

ബി.ജെ.പിയിലെ എന്‍റെ ചില സുഹൃത്തുക്കളുമായി സംസാരിച്ചതിന് ശേഷം എന്‍റെ ഫോണിലേക്ക് വരുന്ന കോളുകൾ ഡൈവേർട്ട് ആയി പോകുകയാണ്. എനിക്ക് ഇപ്പോൾ വിളിക്കാനോ സംസാരിക്കാനോ കഴിയില്ല. സിം പുനഃസ്ഥാപിച്ചാലും ബിജെപി, തൃണമൂൽ കോൺഗ്രസ്, ബിജെഡി എംപിമാരുമായി ഫോണിൽ ബന്ധപ്പെടാൻ കഴിയില്ലെന്നും ആൽവ ട്വീറ്റ് ചെയ്തു.