മരിച്ചവരുടെയും വിദേശത്തുള്ളവരുടെയും തിരിച്ചറിയൽ കാർഡ് സിപിഎം ശേഖരിക്കുന്നതായി ആരോപണം

കാഞ്ഞങ്ങാട്: മരിച്ചവരുടെയും വിദേശത്തുള്ളവരുടെയും തെരഞ്ഞെടുപ്പ് തിരിച്ചറിയൽ കാർഡുകൾ സിപിഎം വ്യാപകമായി ശേഖരിക്കുന്നതായി ആരോപണം. പള്ളിക്കര പഞ്ചായത്തിലെ യുഡിഎഫ് -കോൺഗ്രസ് നേതാക്കളാണ് ആരോപണമുയർത്തിയിട്ടുള്ളത്. സിപിഎം ശക്തി കേന്ദ്രമായ ആലക്കോട്, പാക്കം, കൂട്ടക്കനി ഭാഗങ്ങളിൽ വ്യാപകമായ രീതിയിൽ കള്ളവോട്ടുകൾ ചെയ്യാനാണ് സിപിഎം ആസൂത്രണം നടത്തുന്നതെന്നാണ് കോൺഗ്രസ് ആരോപണം.

കഴിഞ്ഞ തദ്ദേശ തെരഞ്ഞെടുപ്പിൽ കെ. കുഞ്ഞിരാമൻ എംഎൽ ഏ പോളിംഗ് ഓഫീസറുടെ കാൽ വെട്ടുമെന്ന് ഭീഷണിപ്പെടുത്തിയ പോളിംഗ് ബൂത്തിൽ ഇത്തവണയും വ്യാപകമായി കള്ളവോട്ടിന് നീക്കം നടക്കുന്നതായി കോൺഗ്രസ് നേതാക്കൾ ആരോപിച്ചു. വിദേശത്തുള്ളവരുടെയും മരിച്ചവരുടെയും തെരഞ്ഞെടുപ്പ് തിരിച്ചറിയൽ കാർഡ് വാങ്ങി കൂട്ടുന്നത് കള്ളവോട്ട് ചെയ്യാനാണെന്നാണ് ആരോപണം.