കാമുകനെത്തേടി പുറപ്പെട്ട പെൺകുട്ടി പീഡനത്തിനിരയായി

സ്വന്തം ലേഖകൻ

അമ്പലത്തറ: ഇൻസ്റ്റഗ്രാമിൽ പരിചയപ്പെട്ട യുവാവിനെത്തേടി പുറപ്പെട്ട പതിനാലുകാരി പീഡനത്തിനിരയായെന്ന പരാതിയിൽ കാമുകനെതിരെ പോക്സോ കേസ്. അമ്പലത്തറ പോലീസ് സ്റ്റേഷൻ പരിധിയിൽ താമസിക്കുന്ന സ്കൂൾ വിദ്യാർത്ഥിനിയാണ് ഇൻസ്റ്റഗ്രാമിൽ പരിചയപ്പെട്ട കാസർകോട് സ്വദേശിയെത്തേടി പുറപ്പെട്ടത്. ഇന്നലെ രാവിലെ സ്കൂളിലേക്ക് പുറപ്പെട്ട വിദ്യാർത്ഥിനി വീട്ടിൽ തിരിച്ചെത്താത്തതിനെത്തുടർന്നാണ് മാതാവ് അമ്പലത്തറ പോലീസിൽ പരാതിയുമായെത്തിയത്.

പരാതിയിൽ കേസെടുത്ത് അന്വേഷണം നടത്തുന്നതിനിടെയാണ് യുവാവിന്റെ ഫോൺ നമ്പർ സൈബർ സെല്ലിന് ലഭിച്ചത്. യുവാവുമായി ഫോണിൽ ബന്ധപ്പെട്ട അമ്പലത്തറ പോലീസ് പെൺകുട്ടിയെ പോലീസ് സ്റ്റേഷനിലെത്തിക്കാൻ കർശ്ശന നിർദ്ദേശം നൽകുകയായിരുന്നു. ഇതേത്തുടർന്ന് യുവാവ് പെൺകുട്ടിയെ സ്റ്റേഷനിലെത്തിച്ചു.  യുവാവ് ആവശ്യപ്പെട്ട പ്രകാരമാണ് പെൺകുട്ടി വീട്ടിൽ നിന്നും ഇൻസ്റ്റഗ്രാം കാമുകനെത്തേടി പുറപ്പെട്ടത്.

പെൺകുട്ടിയെ പോലീസ് ചോദ്യം ചെയ്തതോടെയാണ് യുവാവ് തന്നെ  ലൈംഗികമായി പീഡിപ്പിച്ചതായി പെൺകുട്ടി വെളിപ്പെടുത്തിയത്. ഇതേത്തുടർന്നാണ് പെൺകുട്ടിയുടെ കാമുകനായ മധൂർ ഉളിയത്തടുക്കയിലെ മുഹമ്മദ് സാദിഖിനെതിരെ 21, അമ്പലത്തറ പോലീസ് പോക്സോ നിയമപ്രകാരം കേസ്സെടുത്തത്.