കരിപ്പൂരിൽ വീണ്ടും വന്‍ സ്വര്‍ണ വേട്ട, പിടിയിലായത് കാസർകോട് സ്വദേശി ഉൾപ്പെടെ മൂന്ന് പേർ

കോഴിക്കോട്: കരിപ്പൂര്‍ വിമാനത്താവളത്തില്‍ നിന്നും വീണ്ടും വന്‍ സ്വര്‍ണ്ണ വേട്ട. ഒരു കോടി മുപ്പത് ലക്ഷം രൂപയുടെ സ്വര്‍ണ്ണമാണ് വ്യാഴാഴ്ച കസ്റ്റംസ് പിടികൂടിയത്. മൂന്ന് പേരില്‍ നിന്നുമാണ് സ്വര്‍ണ്ണം പിടികൂടിയത്. എയര്‍പോഡിനുള്ളിലും അടിവസ്ത്രത്തിലും ഒളിപ്പിച്ചാണ് ഇവര്‍ സ്വര്‍ണ്ണം കടത്താന്‍ ശ്രമിച്ചത്.

കാളികാവ് സ്വദേശി നൂറുദ്ദീന്‍, കാസര്‍കോട് സ്വദേശി അബ്ദുള്‍ സലാം, പുതുപ്പാടി സ്വദേശി ഹുസൈന്‍ എന്നിവരെയാണ് ഉദ്യോഗസ്ഥര്‍ പിടികൂടിയത്. 20,000 മുതല്‍ 70,000 രൂപ വരെ പ്രതിഫലത്തിനാണ് ഇവര്‍ സ്വര്‍ണ്ണം കടത്തിയതെന്നാണ് സൂചനകള്‍. ബുധനാഴ്ച കരിപ്പൂരില്‍ നിന്നും 55 ലക്ഷം രൂപ വിലമതിക്കുന്ന ഒരു കിലോയോളം വരുന്ന സ്വര്‍ണ്ണം പിടികൂടിയിരുന്നു.