കോണ്‍ഗ്രസിലേക്ക് തിരികെയെത്താനുറച്ച് ഗുലാം നബി ആസാദ്

ന്യൂഡല്‍ഹി: നാല് മാസം മുമ്പ് നാടകീയമായി പാർട്ടി വിട്ട മുതിർന്ന കോൺഗ്രസ് നേതാവ് ഗുലാം നബി ആസാദ് പാർട്ടിയിലേക്ക് തിരികെ മടങ്ങാനുള്ള നീക്കങ്ങൾ നടത്തുന്നതായി റിപ്പോർട്ട്. ഗുലാം നബി ആസാദ് കോൺഗ്രസ് നേതൃത്വവുമായി ചർച്ച നടത്തിവരികയാണെന്നും റിപ്പോർട്ടുകളുണ്ട്.

ഓഗസ്റ്റ് 26 നാണ് ഗുലാം നബി കോൺഗ്രസുമായുള്ള അഞ്ച് പതിറ്റാണ്ടിലേറെ നീണ്ട ബന്ധം വിച്ഛേദിച്ചത്. ഒക്ടോബറിൽ ജമ്മു കശ്മീർ ആസ്ഥാനമായി ഡെമോക്രാറ്റിക് ആസാദ് പാർട്ടി എന്ന പേരിൽ ഒരു പുതിയ രാഷ്ട്രീയ പ്രസ്ഥാനവും രൂപീകരിച്ചിരുന്നു.

ബി.ജെ.പിയെ നേരിടാൻ കോൺഗ്രസിന് മാത്രമേ കഴിയൂവെന്ന് അദ്ദേഹം അടുത്തിടെ പറഞ്ഞിരുന്നു. കോൺഗ്രസിന്‍റെ നയത്തെയല്ല, മറിച്ച് അതിന്‍റെ ദുർബലമായ സംഘടനാ സംവിധാനത്തെയാണ് എതിർക്കുന്നതെന്നും അദ്ദേഹം പറഞ്ഞു.