പഠനത്തിനും ജോലിക്കും ജനനസര്‍ട്ടിഫിക്കറ്റ് നിര്‍ബന്ധമാക്കുമെന്ന് കേന്ദ്രം

ന്യൂഡല്‍ഹി: വിദ്യാഭ്യാസം, തൊഴിൽ, പാസ്പോർട്ട് എന്നിവയ്ക്ക് ജനന സർട്ടിഫിക്കറ്റ് നിർബന്ധമാക്കാൻ കേന്ദ്രസർക്കാർ ആലോചന. 1969 ലെ ജനന-മരണ രജിസ്ട്രേഷൻ നിയമം ഭേദഗതി ചെയ്യുന്നതിനുള്ള ബിൽ പാർലമെന്‍റിന്‍റെ ശീതകാല സമ്മേളനത്തിൽ അവതരിപ്പിച്ചേക്കും. പൊതുജനാഭിപ്രായം തേടി കഴിഞ്ഞ വർഷമാണ് കരട് ബിൽ പുറത്തിറക്കിയത്. സംസ്ഥാന സർക്കാരുകളിൽ നിന്നും മറ്റുള്ളവരിൽ നിന്നും ലഭിച്ച നിർദ്ദേശങ്ങൾ കണക്കിലെടുത്ത് മാറ്റങ്ങളോടെ ബിൽ പാർലമെന്‍റിൽ അവതരിപ്പിക്കും. ശീതകാല സമ്മേളനം അടുത്ത മാസം ഏഴിന് ആരംഭിക്കും.

വിദ്യാഭ്യാസ സ്ഥാപനങ്ങളിലെ പ്രവേശനം, വോട്ടവകാശം, പാസ്പോർട്ട്, ഡ്രൈവിംഗ് ലൈസൻസ്, വിവാഹ രജിസ്ട്രേഷൻ, പൊതുമേഖല, തദ്ദേശഭരണ വകുപ്പുകളിലെ തൊഴിൽ നിയമനങ്ങൾ എന്നിവയ്ക്ക് ജനന സർട്ടിഫിക്കറ്റ് നിർബന്ധമാക്കുമെന്ന് ബിൽ പറയുന്നു. ജനനവും മരണവും നിലവിലുള്ള നിയമപ്രകാരം തന്നെ രജിസ്റ്റർ ചെയ്യേണ്ടത് നിർബന്ധമാണ്. സ്കൂൾ പ്രവേശനം പോലുള്ള അടിസ്ഥാന സേവനങ്ങൾക്ക് ജനന സർട്ടിഫിക്കറ്റ് നിർബന്ധമാക്കുന്നതോടെ നിയമം കൃത്യമായി പാലിക്കപ്പെടുന്നുണ്ടെന്ന് ഉറപ്പാക്കും.

ജനനവും മരണവും സംഭവിച്ചാൽ ആശുപത്രികളിൽ നിന്ന് ബന്ധുക്കൾക്ക് നൽകുന്ന സർട്ടിഫിക്കറ്റുകളുടെ പകർപ്പ് അതത് രജിസ്ട്രാർമാർക്ക് നൽകേണ്ടത് നിർബന്ധമാക്കും. യഥാസമയം വിവരങ്ങൾ നൽകിയില്ലെങ്കിൽ ആശുപത്രികൾക്ക് പിഴ ചുമത്തും. പിഴ നേരത്തെ 50 രൂപയായിരുന്നത് 1000 രൂപയായി ഉയർത്തി. രജിസ്റ്റർ ചെയ്ത ഓഫീസുകളിൽ ലഭിക്കുന്ന ഈ വിവരങ്ങൾ കേന്ദ്രതലത്തിൽ സൂക്ഷിക്കും. ഇതുവഴി, നിങ്ങൾക്ക് 18 വയസ്സ് തികയുകയാണെങ്കിൽ, നിങ്ങളുടെ പേര് വോട്ടർ പട്ടികയിൽ ചേർക്കാനും ആ വ്യക്തി മരിച്ചാൽ, അവന്‍റെ / അവളുടെ പേര് നീക്കം ചെയ്യാനും കഴിയും.