ഭാരത് ജോഡോ യാത്രയ്ക്കിടെ 4 പ്രവർത്തകർക്ക് വൈദ്യുതാഘാതമേറ്റു

ബംഗളുരു: കർണാടകയിലെ ബെല്ലാരിയിൽ കോൺഗ്രസിന്‍റെ ഭാരത് ജോഡോ യാത്രയ്ക്കിടെ വൈദ്യുത അപകടം. നാല് പ്രവർത്തകർക്ക് വൈദ്യുതാഘാതമേറ്റു. നാലുപേരെയും ബെല്ലാരിയിലെ ആശുപത്രിയിൽ പ്രവേശിപ്പിച്ചു.

ഭാരത് ജോഡോ യാത്ര കടന്നുപോകുന്നതിന് തൊട്ടുമുമ്പ്, ഫ്ലെക്സുകളും മറ്റ് സാധനങ്ങളുമുള്ള ഒരു വാഹനവും കോൺഗ്രസ് മാധ്യമ സ്ഥാപനത്തിലെ പ്രവർത്തകരുടെ വാഹനവും കടന്നുപോകുന്നുണ്ടായിരുന്നു. ഫ്ലക്സുകൾ കൈകാര്യം ചെയ്തിരുന്ന വാഹനങ്ങളിലെ നാല് തൊഴിലാളികൾക്കാണ് വൈദ്യുതാഘാതമേറ്റത്.

ഇവർ സഞ്ചരിച്ചിരുന്ന വാഹനത്തിലെ ഇരുമ്പ് വടി വൈദ്യുത ലൈനിൽ ഇടിച്ചാണ് അപകടമുണ്ടായതെന്നാണ് വിവരം. നാല് പേരുടെയും പരിക്കുകൾ ഗുരുതരമല്ല. പരിക്കേറ്റവർക്ക് കോൺഗ്രസ് ഒരു ലക്ഷം രൂപ വീതം നഷ്ടപരിഹാരം പ്രഖ്യാപിച്ചിട്ടുണ്ട്.