തൃക്കരിപ്പൂർ റൂട്ടിൽ സ്വകാര്യബസ് ജീവനക്കാരുടെ മിന്നൽ പണിമുടക്ക്

സ്വന്തം ലേഖകൻ

തൃക്കരിപ്പൂർ: സ്വകാര്യ ബസ് കണ്ടക്ടറെ ഓട്ടോ ഡ്രൈവർ മർദ്ദിച്ചതിൽ പ്രതിഷേധിച്ച് തൃക്കരിപ്പൂർ റൂട്ടിൽ നടക്കുന്ന സ്വകാര്യ ബസ് ജീവനക്കാരുടെ മിന്നൽ പണിമുടക്ക് ഇന്നും തുടർന്നു. ഇന്നലെ ഉച്ചയ്ക്ക് 12.45 മുതലാണ് തൃക്കരിപ്പൂർ റൂട്ടിൽ മിന്നൽ പണിമുടക്കാരംഭിച്ചത്.

ഇന്നലെ ഉച്ചയ്ക്കാണ് പയ്യന്നൂർ – ചെറുവത്തൂർ റൂട്ടിലോടുന്ന സ്വകാര്യ ബസ്സിന്റെ കണ്ടക്ടർ മാണിയാട്ടെ മഞ്ഞവീട്ടിൽ മഹേഷിനെ 40, ബീരിച്ചേരിയിൽ ഓട്ടോ ഡ്രൈവർ മർദ്ദിച്ചത്. കെഎൽ -60 പി. 1862 നമ്പർ ഓട്ടോ ഓടിക്കുന്ന വിപിയു നൗഷാദാണ് 45, മഹേഷിനെ മർദ്ദിച്ചത്.

സംഭവത്തിന് തൊട്ടു പിന്നാലെയാണ് തൃക്കരിപ്പൂർ റൂട്ടിൽ സ്വകാര്യ ബസ് തൊഴിലാളികൾ മിന്നൽ പണിമുടക്ക് പ്രഖ്യാപിച്ചത്. മഹേഷിന്റെ പരാതിയിൽ നൗഷാദിനെതിരെ ചന്തേര പോലീസ് കേസ്സെടുത്തു.