‘ആഭ്യന്തര വകുപ്പിന്‍റെ ചുമതല ആര്‍ക്ക്’? രൂക്ഷ വിമർശനവുമായി ഗവർണർ

കോഴിക്കോട്: ഗവർണറും സർക്കാരും തമ്മിലുള്ള പോര് രൂക്ഷമാകുന്നു. മുഖ്യമന്ത്രിയുടെ വിമർശനത്തിന് മറുപടിയുമായി ഗവർണർ ആരിഫ് മുഹമ്മദ് ഖാൻ രംഗത്തെത്തി. ഗവർണർ പദവിയെ അപകീർത്തിപ്പെടുത്താനാണ് സംസ്ഥാന സർക്കാർ ശ്രമിക്കുന്നത്. മൂന്ന് വർഷം മുമ്പ് കണ്ണൂരിൽ വച്ച് തനിക്ക് നേരെ വധശ്രമം നടന്നിരുന്നു. സംഭവത്തിൽ കേസെടുക്കാത്തതിൽ പോലീസിനെ വിമർശിച്ച ഗവർണർ ആഭ്യന്തര വകുപ്പിന്‍റെ ചുമതല ആർക്കാണെന്നും ചോദിച്ചു. ആരാണ് പോലീസിനെ ഇത് ചെയ്യുന്നതിൽ നിന്ന് തടഞ്ഞതെന്ന് ഗവർണർ ചോദിക്കുന്നു.

പ്രൈവറ്റ് സെക്രട്ടറിയുടെ ഭാര്യയുടെ നിയമനം അറിഞ്ഞുവെന്ന ഗവർണറുടെ ആരോപണം അസംബന്ധമാണെന്ന് പിണറായി വിജയൻ കഴിഞ്ഞ ദിവസം പറഞ്ഞിരുന്നു. ഗവർണർ പറഞ്ഞതിനേക്കാൾ കൂടുതൽ അസംബന്ധം മറ്റാർക്കും പറയാനാകില്ലെന്നും താൻ ഇരിക്കുന്ന സ്ഥാനത്തിന്‍റെ മഹത്വം കണക്കിലെടുക്കാതെ എന്തും പറയാൻ ഗവർണർക്ക് അധികാരമുണ്ടോ എന്നും മുഖ്യമന്ത്രി ചോദിച്ചു. ജീവനക്കാരുടെ ബന്ധു മുഖ്യമന്ത്രിയോട് ചോദിച്ച ശേഷമാണോ അപേക്ഷിക്കുന്നത്. എന്തെങ്കിലും പിശക് ഉണ്ടെങ്കിൽ, നമുക്ക് പരിശോധിക്കാം. തെറ്റ് ചെയ്തവർ ശിക്ഷ അനുഭവിക്കുമെന്നും മുഖ്യമന്ത്രി പറഞ്ഞു. മുഖ്യമന്ത്രിയുടെ പ്രൈവറ്റ് സെക്രട്ടറി കെ കെ രാഗേഷിന്‍റെ ഭാര്യ പ്രിയ വർഗീസിനെ കണ്ണൂർ സർവകലാശാലയിലേക്ക് നിയമിച്ചതുമായി ബന്ധപ്പെട്ട ഗവർണറുടെ പരാമർശമാണ് മുഖ്യമന്ത്രിയെ ചൊടിപ്പിച്ചത്.

സംസ്ഥാന സർക്കാരിനെതിരായ ഗവർണറുടെ വിമർശനങ്ങൾ കേന്ദ്രത്തിൽ ഉയർന്ന പദവി പ്രതീക്ഷിച്ചുള്ളതാണെന്ന് പറഞ്ഞാണ് ആരിഫ് മുഹമ്മദ് ഖാനെതിരെ മുഖ്യമന്ത്രി വിമർശനം ശക്തമാക്കിയത്. നിയമപരമായി പാസാക്കുന്ന ബില്ലുകളിൽ ഒപ്പിടാൻ ഗവർണർക്ക് ഒരു തടസ്സവും ഉണ്ടാകരുതെന്നും അതിൽ സർക്കാരിന് ആശങ്കയില്ലെന്നും മുഖ്യമന്ത്രി പറഞ്ഞു. ഗവർണർക്ക് മറുപടി നൽകാനുള്ള സി.പി.എമ്മിന്‍റെ രാഷ്ട്രീയ തീരുമാനത്തിന് അനുസൃതമായാണ് പിണറായിയുടെ വിമർശനം.