ദമ്പതികളെ ഇടിച്ച് വീഴ്ത്തി രക്ഷപ്പെട്ടയാളെ കണ്ടെത്തി

സ്വന്തം ലേഖകൻ

കാഞ്ഞങ്ങാട് : ഇരുചക്രവാഹനത്തിൽ യാത്ര ചെയ്യുകയായിരുന്ന ദമ്പതികളെ പിന്നിൽ നിന്നും ഇടിച്ചു വീഴ്ത്തി രക്ഷപ്പെട്ട യുവാവിനെ കണ്ടെത്തി. ആഗസ്റ്റ് 10-ന് രാത്രി 8-20-ന് ലേറ്റസ്റ്റ് ഓഫീസിന് സമീപം നടന്ന വാഹനാപകടത്തിൽ ദമ്പതികളെ ഇടിച്ച് വീഴ്ത്തിയ ശേഷം സ്ഥലത്ത് നിന്നും മുങ്ങിയ യുവാവിനെയാണ് ഹോസ്ദുർഗ്ഗ് പോലീസ് അന്വേഷണത്തിലൂടെ കണ്ടെത്തിയത്.

സതീഷ് കമ്മത്ത്, ഭാര്യ ലളിത എന്നിവർ സഞ്ചരിച്ചിരുന്ന വാഹനത്തിന് പിറകിലാണ് പുറകെ നിന്നെത്തിയ ബൈക്കിടിച്ചത്. അപകടം കണ്ട് സ്ഥലത്തെത്തിയ പരിസരവാസിയായ സിവിൽ പോലീസ് ഉദ്യോഗസ്ഥൻ യു. പ്രവീൺ തന്റെ മൊബൈൽ ഫോണിൽ പകർത്തിയ ഫോട്ടോയാണ് പ്രതിയെ കണ്ടെത്തുന്നതിന് സഹായകമായത്.

കാഞ്ഞങ്ങാട്ടെ ഇലക്ട്രിക്കൽ സ്ഥാപനത്തിൽ ജോലി ചെയ്യുന്ന വെങ്കിട്ടറാം ഓടിച്ചിരുന്ന വാഹനമാണ് സതീഷ് കമ്മത്തിെനയും ഭാര്യ ലളിതയെയും പിന്നിൽ നിന്നും ഇടിച്ച് വീഴ്ത്തിയത്. പരിക്കേറ്റ ദമ്പതികളെ നാട്ടുകാർ ആശുപത്രിലെത്തിക്കാനേർപ്പെടുത്തിയ വാഹനത്തിൽ വെങ്കിട്ടറാമും കയറിയിരുന്നുവെങ്കിലും യുവാവ് ആശുപത്രിയിൽ നിന്നും മുങ്ങുകയായിരുന്നു.