കാറിനകത്ത് മദ്യപാനം ചോദ്യം ചെയ്ത പോലീസിന്റെ വാഹനം തടഞ്ഞ് സംഘം രക്ഷപ്പെട്ടു

കാഞ്ഞങ്ങാട്: പാതിരാത്രി റോഡിൽ നിർത്തിയിട്ട കാറിനുള്ളിൽ മദ്യപിക്കുകയായിരുന്ന സംഘം പോലീസിനെ ഭീഷണിപ്പെടുത്തി. പോലീസ് വാഹനം തടഞ്ഞ മദ്യപ സംഘം കാറുമായി രക്ഷപ്പെട്ടു. സൗത്ത് ചിത്താരിയിൽ കഴിഞ്ഞ ദിവസം രാത്രി ഒരു മണിക്കാണ് സംഭവം. നൈറ്റ് പട്രോളിംഗ് നടത്തുകയായിരുന്ന കാഞ്ഞങ്ങാട് കൺട്രോൾ റൂമിലെ പോലീസുദ്യോഗസ്ഥർ സൗത്ത് ചിത്താരി റോഡരികിൽ കാർ നിർത്തിയിട്ടതു കണ്ട് അന്വേഷിച്ചെത്തിയതായിരുന്നു.

പരിശോധനയിൽ ഒരു സംഘം കാറിനകത്ത് മദ്യപിക്കുന്നതായി കണ്ടെത്തി. ചോദ്യം ചെയ്തപ്പോൾ ഡ്യൂട്ടിയിലുണ്ടായിരുന്ന പോലീസുകാരോട് തട്ടിക്കയറി ഭീഷണിപ്പെടുത്തുകയായിരുന്നു. സംഘം സഞ്ചരിച്ച കാർ പോലീസ് വാഹനത്തിന് കുറുകെയിട്ട് ഭീഷണി മുഴക്കുകയും ചെയ്തു.

കൺട്രോൾ റൂം ഡ്യൂട്ടിയിലുണ്ടായിരുന്ന നീലേശ്വരം  പോലീസ് സ്റ്റേഷനിലെ പോലീസുദ്യോഗസ്ഥൻ കുഞ്ഞബ്ദുള്ളയുടെ പരാതിയിൽ പോലീസുകാരെ തടഞ്ഞ് ഔദ്യോഗിക കൃത്യനിർവ്വഹണം തടസ്സപ്പെടുത്തിയതിന് കേസ്സെടുത്തിട്ടുണ്ട്. പ്രതികൾ സഞ്ചരിച്ച കാർ ഇന്ന് രാവിലെ സൗത്ത് ചിത്താരിയിലെ ഒരു വീട്ടിൽ നിന്നും ഹൊസ്ദുർഗ് എസ്ഐ, കെ. പി. സതീഷ് കസ്റ്റഡിയിലെടുത്തു. പ്രതികൾക്ക് തെരച്ചിൽ നടത്തിവരുന്നു.